rss
Twitter Delicious Facebook Digg Stumbleupon Favorites

Friday, February 19, 2010

မကြည်ဖြူကို ပြောပေးပါ

ကျွန်တော့်လက်ထဲမှာ
အပြုံးယဲ့ယဲ့ ဗလာစာအုပ်လေးဟာ
ဒုတိယမြောက်မြားစွာကို
ထမ်းထားရရှာတယ်။

ဒီစာအုပ်ထဲမှာ
တရုတ်သီချင်း အေးအေးလေးတွေနဲ့ 
မကြည်ဖြူရဲ့  ရယ်သံတွေ
အိပ်နေတယ်။

ဒီစာအုပ်ထဲမှာ
ကဗျာတစ်ပုဒ်ကို
အကြောင်းပြချက်မဲ့စွာ ညည်းတတ်တဲ့
ခဲတံချွန်ချွန်လေးတစ်ချောင်း  ညပ်နေတယ်။

ဒီစာအုပ်ထဲမှာ
အရာရာဟာ သူ့ အတိုင်းသူ ရှိနေပါစေ ဆိုတဲ့
တစ်ယောက်တည်း ရန်ဖြစ်တတ်သူ
နောင်ကြီးတစ်ဦးရဲ့ 
မျက်မှန်ကိုင်းလေးလည်း သေနေတယ်။

မကြည်ဖြူရေ
အလိုလို လုပ်ယူထားတဲ့
မိုးအတုတွေလည်း
ငြိမ်းပြီ။

အက္ခရာစဉ်အတိုင်း
တူရာတူရာ တွဲထားတဲ့
မပီမသ နေ့ လည်စာတစ်နပ်လည်း
ပီပီသသ အသိမ်းခံရပြီးပြီ။

ပြီးခဲ့တာတွေ မပြီးသေးတဲ့ဟောဒီကောင်ကတော့
အစိမ်းရောင် အင်္ကျီထဲမှာ
ချောက်ကမ်းပါးရောင် နက်မှောင်နေတုန်းပဲ။

ဒီဗလာစာအုပ်လေးပဲ
ခဏခဏ ဖွင့်ဖတ်မိတယ်
ဆန်းဆန်းပြားပြားတွေမပါဘဲ
ရိုးရိုးလေး နေချင်ရုံ၊လေချင်ရုံပါ
မကြည်ဖြူ။

ကျွန်တော်က အပျင်းကြီးတော့
ကျောရိုးတစ်လျှောက် ကို
နေ့ စဉ် ခုတ်ထွင်ရှင်းလင်းရတာပေါ့။

တစ်စုံတစ်ယောက်ရဲ့  ပယောဂမပါဘဲ
မကြည်ဖြူကို တိုင်တည်ပြီး
တစ်စုံတစ်ရာကို ၀န်ခံကြည့်မယ်၊
`သတိရတယ်..မကြည်ဖြူ´
က၀ိတွေ ပန်းပျိုးသလို၊
ဥယျာဉ်မှူးတွေ လင်္ကာစပ်သလို၊
နှင်းခေတ်က ကျောက်နံရံပန်းချီတွေ မီးလောင်သလို၊
မကြည်ဖြူကို ကျွန်တော် သိပ်သတိရတယ်။

အမှန်ပါ ..မကြည်ဖြူ
အမှန်ပါ၊
ဗလာစာအုပ်လေး
မျက်စိကွယ်ခဲ့တာ လည်းအမှန်ပါ၊
အောက်တိုဘာ ၂၅ ရက်စွဲ တစ်ခု
အခိုးခံလိုက်ရတာလည်း အမှန်ပါ၊
ကျွန်တော်တို့ 
တစ်ယောက်နဲ့ တစ်ယောက်
နေရာအနှံ့  ဝေးခဲ့ကြတာလည်း အမှန်ပါ။

မကြည်ဖြူရေ ...
အမှန်တရားထဲမှာ နေထိုင်ပါ၊
မြေကြီးလို သစ္စာရှိပါ၊
ကောင်းကင်လို ရိုးသားပါ၊
ပြဌာန်းဖတ်စာအုပ်တွေ ကို
ရိုသေစွာ ကိုင်တွယ်ပါ။
-နေ့ သစ် (၈.၁.၂၀၀၉)

2 comments:

လင်းဒီပ said...

မကြည်ဖြူရေ
အဲဒီစာအုပ်ကလေးကို ဖြည်းဖြည်းညှင်းညှင်း ဖတ်ကြည့်ပေးပါ ...

bravo said...

နေ့သစ်ရေ.......
၂၀၀၉ တစ်လပိုင်း လောက်ကတည်းက
ဒီလို ညက်ညောတဲ့အရေးသားတွေပိုင်ဆိုင်ခဲ့တာ..
လေးစားစရာပါပဲ.......
ငါ ချီးကျူးပါရစေကွာ.....


ပြီးခဲ့တာတွေ မပြီးသေးတဲ့ဟောဒီကောင်ကတော့
အစိမ်းရောင် အင်္ကျီထဲမှာ
ချောက်ကမ်းပါးရောင် နက်မှောင်နေတုန်းပဲ။

ရေးတတ်လိုက်တာကွာ...